Naše město

Jenož 10 kilometrow južnje wokrjesneho města Budyšin leži Wjelećin wosrjedź rjaneje Hornjeje Łužicy. Tomu abo tamnemu je wone snano hižo znate, te město palenca.
Přetož wottud wón přińdźe, tón "WJELEĆINSKI". Z lěta 1842 produkuja so we Wjelećinskej palencarni spirituozy, přez kotrež je naše městačko daloko přez hranicy regiona znate. Snano znajeće nas samo přez to?

Z lěta 1920 namaka so w měšćanskim woponje pokiw na najwažniše produkciske hałužki města: nalěwo stej złoty čołmik (tekstilijowa industrija) a złota winowa kić (palencarnja) widźeć. Slěborna postawa žónskeje we woponje je Justicija, staroromska bohowka sprawnosće. Wona wjedźe so pozdaću hižo z lěta 1669 w měšćanskim woponje, dokelž bu tehdy Wjelećinej wikowanske a měšćanske prawo přez sakskeho kurwjercha spožčene.

Ale nimo dobreho bruneho palenca móže Wjelećin hišće tójšto wjace skićeć. Sće na přikład hižo jónu wo Pumpoće słyšeli? Tuta dźiwna postawa naspomni so w mnohich bajach regiona. Samo w Ludwiga Bechsteinowej němskej bajowej knize namakaja so powědki wo nim. A my we Wjelećinje jeho wězo znajemy, wšako je wón maskotka našeho města. Hišće dźensa móžeće wulku drjewjanu postawu njedaloko měšćanskeho zarjada wobdźiwać. Přez derje wutwarjene kolesowarske a pućowanske šćežki hodźi so wokolina Wjelećina najlěpje wotkrywać. Tak wupłaći so na přikład tež wulět do našich měšćanskich dźělow.

Zapadnje namakaće Tućicy we wuskim hórskim dole. W małej wjesce njewužórli so jenož Butrowa woda, wona skići zajimcam z něhdyšej šulu a časnikowej wěžičku tež rjany fotowy motiw. Runje tak załoži so derje do hotela „Erbgericht“ w Tućicy abo da so swjedźeń wuhotować. Jako cil pućowanja poskići so tež hórski hosćenc na Pichowje – nic jenož rjaneho wuhlada dla. Sewjernje Wjelećina leža Wostašecy – prawa hórska wjeska z mnohimi prózdninskimi bydlenjemi.

Abo Wy pućujeće hišće kónčk dale – na přikład k hosćencej „Schöne Aussicht“ w Zdźarju, najmjeńšemu měšćanskemu dźělej Wjelećina. Tam móžeće tež zhonić, čehodla njedawaja w Zdźarju žane wróble abo sej historisku studnjowu stwu wobhladać.

Hdyž sće nětko wćipni a chceće wjace wo Wjelećinje zhonić, rozhladujće so hišće tróšku na našej internetowej stronje a přińdźće na kóždy pad raz nimo!

Wjeselimy so!